Á Reykjum er rannsóknaaðstaða verkefnisins For Hot sem samanstendur af fimm langtíma vistkerfistilraunum á misheitu landi í graslendum og skógi.
Í dag eru í gangi alls níu mismunandi rannsóknaverkefni sem nota þessa rannsóknainnviði LBHÍ á Reykjum, sem flest hafa Evrópska/erlenda rannsóknastyrki. Það lang stærsta, er verkefni sem nefnist FutureArctic og er doktorsnemaskóli styrktur af Evrópusambandinu.
Future Arctic Evrópuverkefni innan Landbúnaðarháskólans
Í gegnum það verkefni eru tveir doktorsnemar hjá okkur, þau Ruth Phoebe sem er við LBHÍ og Amir Hamidpour hjá Svarma ehf. en 13 aðrir doktorsnemar vinna sínar rannsóknir í samstarfi við LBHÍ. Í heildina eru þetta 15 doktorsnemar víðs vegar að úr heiminum.
Hópurinn kom saman nú á dögunum á Íslandi og héldu vísindaráðstefnu í Hannesarholti í Reykjavík þar sem þau kynntu stöðu verkefna sinna og vinnu. Alls hafa nú komið út 30 vísindagreinar í alþjóðlegum vísindaritum sem byggja eingöngu á þessum rannsóknainnviðum LBHÍ. Þarna er því að safnast saman einstakur fróðleikur um íslenska náttúru, um efnaferla í íslenskum jarðvegi, jarvegslíffræði og plöntuvistfræði sem og samspil plantna, dýra og veðurfars í íslenskri náttúru.
Auk vísindaráðstefnunnar var farið í vettvangsferðir og rannsóknaaðstaða skoðuð og íslensk náttúra heimsótt.
