Mennta- og menningarmálaráðuneytið hefur staðfest breytingu á heiti brautar umhverfisskipulags í landslagsarkitektúr. FÍLA, Félag íslenskra landslagsarkitekta hvatti brautina til nafnabreytingar við aðild félagsins að umsókn brautarinnar til IFLA, International Federation of Landscape Architecture, um viðurkenningu á náminu.
„Þessi breyting gerir okkur kleift að tengja námið enn betur við fag landslagsarkitekta og gera sýnilegra“ segir Kristín Pétursdóttir brautastjóri.
Aukin áhersla er á tengingu manns við náttúruna og mikilvægt að sjálfbærni og vistvæn nálgun sé í fyrirrúmi. Náttúran hefur aldrei verið eins mikið í brennidepli og mikilvægt að vanda til verka til framtíðar. Hvort sem það er að vernda viðkvæmar náttúruperlur eða hanna umgjörð sem fellur vel að umhverfinu þá sameinar landslagsarkitekt þekkingu á sviði náttúru- og umhverfisvísinda jafnt og þekkingu á byggingarfræði og hönnun.
Við Landbúnaðarháskóla Íslands höfum við menntað fólk í umhverfisskipulagi eða bakkalár nám í landslagsarkitektúr í nítján ár með góðum árangri og það er því spennandi að þróa námið enn frekar með nafnabreytingunni.
Bréf menntamálaráðuneytis:
„Með bréfi mennta- menningarmálaráðuneyti til Landbúnaðarháskóla Íslands 5. september 2007 var veitt staðfesting þess að Landbúnaðarháskóli Íslands hefði viðurkenningu á fræðasviðinu Náttúruvísindi ásamt ákveðnum undirflokkum þess. Viðurkenningin nær til undirflokka fræðasviðsins þ.e. náttúru- og umhverfisfræði, skógfræði og landgræðslu og umhverfisskipulags. Enska heiti undirflokksins er Landscape Planning and Architecture.
Þar sem skólinn er með viðurkenningu á ofangreindum undirfokkum fræðasviðsins er það Landbúnaðarháskóla Íslands að ákveða heiti brautarinnar og gerir mennta- og menningarmálaráðuneytið ekki athugasemdir við þau áform hans að brautin fái heitið Landslagsarkitektúr“
