Við endurnýjun samnings milli Menntaskóla Borgarfjarðar og Landbúnaðarháskóla Íslands um sameiginlega stúdentsprófs- og starfsmenntanámsbraut í mars á síðasta ári. F.v. Ólöf Ósk Guðmundsdóttir brautarstjóri búfræði, Guðrún Björg Aðalsteinsdóttir fyrrverandi skólameistari MB og Ragnheiður I. Þórarinsdóttir rektor LbhÍ
Undanfarin ár hefur verið boðið upp á sameiginlega braut Menntaskóla Borgarfjarðar og Landbúnaðarháskóla Íslands. Þar geta nemendur tekið tveggja ára nám í MB þar sem megináherslan er á kjarnagreinar til stúdentsprófs og valdar raunvísindagreinar. Seinni tvö árin eru tekin á Hvanneyri þar sem starfsmenntanám í búfræði fer fram. Nemandinn útskrifast þá með stúdentspróf frá MB og sem búfræðingur frá LbhÍ. Námið er ætlað að veita nemendum góðan undirbúning undir störf í garðyrkjugreinum og landbúnaði en einnig undir frekara háskólanám í náttúruvísindum, búvísindum, dýralækningum eða umhverfisfræðum svo dæmi séu tekin.
Bragi Þór Svavarsson, skólameistari Menntaskóla Borgarfjarðar, segir að við Menntaskóla Borgarfjarðar hafi frá upphafi verið lögð mikil áhersla á að vera í nánu samstarfi við fyrirtæki og stofnanir í nærumhverfi. „Samstarf MB og LbhÍ hefur því verið afar ánægjulegt og komið sér mjög vel fyrir nemendur MB að geta valið sér námsbrautina Náttúrufræðibraut – búfræðisvið.“
Endurnýjun samnings
Rektor LbhÍ segir að í framhaldi af undirritun samningsins hafi verið rætt við stjórnendur MB um að útvíkka samninginn til þess að hann tæki einnig til garðyrkjugreina LbhÍ að Reykjum auk þess sem rætt var við Olgu Lísu Garðarsdóttur, skólameistara Framhaldsskóla Suðurlands, um möguleika á sambærilegu samstarfi.
Spennandi möguleikar
Nú stendur til að bæta við þetta samstarf og bjóða upp á að taka sameiginlega gráðu til stúdentsprófs og garðyrkjufræðings. Þá mun nemandinn byrja nám sitt í MB og taka seinni tvö árin á Reykjum í Ölfusi þar sem starfsmenntanám í garðyrkju fer fram. Að sögn Guðríðar Helgadóttur, starfsmenntanámsstjóra við LbhÍ, hefur lengi verið draumur innan garðyrkjunnar að fara af stað með sams konar fyrirkomulag og í búfræðinni, að vinna með framhaldsskólum að sameiginlegri prófgráðu stúdentsprófs og sérhæfðs starfsmenntanáms.
„Við vonum að sem flest ungt fólk sjái kosti þess að mennta sig í garðyrkju, það vantar fólk í garðyrkjuna,“ segir Guðríður.
-greinin birtist í Bændablaðinu 23.apríl 2020
