Í haust, 5.-6. Október, verður haldin ráðstefna í Postojna í Slóveníu á vegum Erasmus+ verkefnisins Safe Climbing sem Landbúnaðarháskóli Íslands stýrir. Verkefnið hefur þann tilgang að útbúa rafrænt námsefni til kennslu í trjáklifri og að þjálfa kennara í trjáklifri.
Fyrri daginn verða fyrirlestrar þar sem Bent Jensen frá Skovskolen kynnir verkefnið og afurðir þess, Tanja Grmovsek fjallar um lífstarfsemi trjáa og áhrif klippinga, David Fucka talar um vernduð tré í Slóveníu og Hannes Snorrason frá Vinnueftirlitnu fjallar um aðkomu eftirlitsmanna á verkstað. Evrópumeistarinn í trjáklifri 2017, Johan Pihl, verður með sýnikennslu fyrir þá sem langar að bæta sig í keppnisklifri.
Seinni dagurinn verður helgaður keppni í trjáklifri þar sem keppendur víðsvegar að úr álfunni spreytasig í nokkrum mismunandi keppnisgreinum s.s. Throwline, Foot lock, Rescue climb, Work climb og Speed climb.
Aðgangur á bæði ráðstefnuna og í keppnina er frír en þörf er á að skrá sig á heimasíðu verkefnisins safeclimbing.net þar sem einnig má finna frekari upplýsingar um verkefnið. Það stefnir í gríðarlega skemmtilegan og spennandi viðburð sem við hjá LbhÍ erum spennt að eiga þátt í.
