Í sumar hefur öflugt teymi starfað á útisvæðum skólans á Hvanneyri. Nanna Vilborg Harðardóttir umsjónamaður útisvæða hefur leitt vinnuna. Nanna er landslagsarkitekt og kláraði grunnnám við LBHÍ áður en hún hélt til Þýskalands í framhaldsnám. Í teymi hennar í sumar störfuðu Fabrizio Albion landslagsarkitekt, Gabriel Ravasz skógfræðingur ásamt Helgu Rán Sigurðardóttur og Ara Kristni Gunnarssyni nemum í landslagsarkitektúr auk Marinó Muggs Þorbjarnasonar náttúru- og umhverfisfræðings.
Auk umsjónar með útisvæðum þá leiddu þau einnig vinnuskóla part úr sumri þar sem hópur ungmenna var við garðyrkjustörf. Þrátt fyrir rigningarsumar hefur umhirða útisvæða skólans verið til fyrirmyndar og vel haldið á spöðunum hvað skipulag varðar. Helstu daglegu verkefni eru umhirða og sláttur grænna svæða í þorpinu á Hvanneyri og hirðing við helstu sögufrægu byggingar staðarins. Þá einnig grisjun og hirðing trjáa sem og ræktun og plöntun sumarblóma og plantna á svæðinu.
Í sumar var lögð áhersla á Frúargarðinn svokallaða sem er einn af eldri skrúðgörðum landsins staðsettur við gamla Skólastjórahúsið. Þar var skemmtilegur viðburður sem börn af leikskóla staðarins tóku þátt í og lögðu sitt af mörkum við fegrun garðsins. Einnig tekið til hendinni í Skjólbeltunum þar sem íbúar og nemendur af öllum skólastigum á Hvanneyri hjálpuðu til og gerðu við eldstæði og svið, en það svæði er mikið notað af nemendum af öllum skólastigum á Hvanneyri allt árið um kring.
