Sú breyting varð frá og með áramótum að Hvanneyrarbúið ehf sér um allan búrekstur Landbúnaðarháskólans. Þannig færðist Sauðfjárræktarbúið á Hesti undir starfsemi Hvanneyrarbúsins.
Hvanneyrarbúið ehf er félag sem er alfarið í eigu LbhÍ og hlutverk þess er búrekstur á hagkvæman hátt með áherslu á að þjónusta kennslu og rannsóknir fyrir LbhÍ og aðra aðila. Samhliða þessum breytingum var fjölgað í stjórn búsins og tóku þau sæti í stjórn Oddný Steina Valsdóttir og Eyþór Einarsson. Stjórn Hvanneyrarbúsins skipa þau, Ragnheiður I. Þórarinsdóttir rektor LbhÍ og stjórnarformaður, Baldur Helgi Benjamínsson, Pétur Diðriksson, Oddný Steina Valsdóttir og Eyþór Einarsson.
Alls eru fjórir fastráðnir starfsmenn eru á Hvanneyrarbúinu, þau Egill Gunnarsson bústjóri, Björn Ingi Ólafsson fjósameistari og tveir nýjir starfsmenn þau Heiðar Árni Baldursson fjármeistari og Vildís Þrá Jónsdóttir bústarfsmaður og aðstoðarmaður rannsókna og kennslu. Á Hesti eru um 620 fjár á vetrarfóðrum en á Hvanneyri eru um 65 mjólkandi kýr auk uppeldis eða um 150 lifandi nautgripir. Til búrekstursins eru undir jarðirnar Hvanneyri, Hestur, Mið-Fossar, Kvígsstaðir og Mávahlíð.
Heiðar Árni Baldursson hefur verið ráðinn sem fjármeistari á fjárbúinu Hesti
Heiðar mun hafa umsjón með ræktunarstefnu, hjarðskýrsluhaldi, aðbúnaði búfjár, vélavinnu og sauðburði á fjárbúinu. Þá mun hann mun einnig taka þátt í rannsóknum, kennslu og innleiðingu nýsköpunar í búrekstri. Heiðar Árni hóf störf í lok síðast árs. Heiðar er menntaður búfræðingur frá LbhÍ og húsasmiður ásamt því að hafa þjálfað og tamið hross í hlutastarfi sem og fullri vinnu frá unga aldri, unnið við smíðar, girðingarvinnu og vélaverktöku auk starfa við sauðburð og smalamennsku í gegnum tíðina.
„Ég er mjög spenntur fyrir starfi fjármeistara á Hesti, hér er mikil saga og framlag til íslenska fjárstofnsins mikið sem spennandi verður að leiða áfram í samstarfi við bústjóra, nemendur og annað starfsfólk Landbúnaðarháskólans.“ Segir Heiðar um nýja starfið.
Vildís Þrá Jónsdóttir aðstoðarmaður rannsókna á Hesti og Hvanneyri
„Nýja vinnan leggst vel í mig, auðvitað er margt nýtt sem þarf að læra en vonandi kemur það allt hratt og örugglega á næstu vikum. Mín helstu verk hingað til hafa verið þessi almennu fjósverk og að aðstoða við þau verk sem hefur þurft meiri mannskap á Hesti. Annað sem ég hef verið að brasa í fjósinu er að sinna verkum sem hafa þurft að sitja á hakanum vegna anna hjá öðrum starfsmönnum.“
Við bjóðum Heiðar og Vildísi innilega velkomin til starfa!
