Karvel L. Karvelsson framkvæmdastjóri Ráðgjafarmiðstöðvar landbúnaðarins og Ragnheiður I. Þórarinsdóttir rektor Landbúnaðarháskóla Íslands undirrituðu í dag samkomulag um samstarf RML og LbhÍ.
Stofnanirnar hafa á undanförnum árum átt í góðu samstarfi um málefni búgreina og sérstakra faglegra þátta sem snerta landbúnað, landnýtingu, umhverfis- og loftslagsmál. Verkefnin eru á sviði ráðgjafar, kennslu, rannsókna og nýsköpunar. Starfsfólk RML kemur m.a. að kennslu hjá LbhÍ og faghópar stofnananna hittast á árlegum fundi til að leggja grunn að samstarfsverkefnum næsta árs. Slíkur ráðunautahópur var haldinn í gær og í dag með fjölda áhugaverðra erinda um verkefni sem eru í gangi. Á næsta starfsári er sérstaklega stefnt að aukinni samvinnu í kynbótum búfjár, bútækni, umhverfis- og loftslagsmálum.
