Námskeiðaröðin Grænni skógar hófst á Hvanneyri í dag. Námskeiðið er haldið af Endurmenntunardeild LbhÍ og er námið ætlað fróðleiksfúsum skógarbændum og áhugasömum skógræktendum sem vilja auka þekkingu sína og ná betri árangri í skógrækt. Námið er metið til eininga á framhaldsskólastigi og lýkur með sérstakri viðurkenningu frá LbhÍ. Jafnframt er námið sniðið að þörfum vinnandi fólks.
Að jafnaði eru haldin tvö til þrjú helgarnámskeið á Grænna skóga námsleiðinni á hverri önn og skiptast þau niður í fyrirlestra og verklega tíma. Vettvangsferðir eru stór hluti af kennslunni og eru námskeiðin haldin á mismunandi stöðum víða um land. Þau eru sérsniðin að sérstöðu landshlutanna, sem gefur náminu aukið gildi og sérhæfingu. LbhÍ sér um framkvæmd námsins í samstarfi við Landssamtök skógareigenda, félög skógarbænda í viðkomandi landsfjórðungi, Skógræktina og Landgræðslu ríkisins.
Námskeiðaröðin hefst á námskeiðinu Skógur og vistkerfi, sem fram fer á Hvanneyri um helgina og fer næsta námskeið fram á Reykjum í Ölfusi 8. og 9. júní nk. Áhugasömum er bent á að kynna sér upplýsingar um námsleiðina á heimasíðu LbhÍ.
