Viltu höggva eigin við í eldinn? Í samstarfi við Skógræktarfélag Reykjavíkur býður Endurmenntun LbhÍ upp á nýtt námskeið um eldivið.
Á námskeiðinu er meðal annars fjallað um fellingu og sögun á minni trjám, hvernig best er að kljúfa viðinn og þurrka. Farið verður yfir eiginleika tegunda og hvaða viður hentar í mismunandi eldstæði. Þá verður fjallað sérstaklega um brunavarnir, mismunandi eldstæði, hvernig megi lágmarka eldhættu og margt, margt fleira.
FJALLAÐ ER MEÐAL ANNARS UM
- Fellingu og sögun á minni trjám.
- Trjátegundir og mismunandi eiginleika þeirra.
- Þurrkun, loftun og raka eldiviðar.
- Eldstæði, umgengni og umhirða þeirra.
- Uppkveikiefni og uppkveikju elds í öruggu umhverfi.
- Eldhættu í görðum og á sumarhúsalóðum.
FYRIR HVERJA
Námskeiðið er hugsað fyrir fólk sem vill geta nýtt greinar og trjástofna sem falla til við umhirðu og grisjun í görðum eða sumarbústaðalóðum. Nú er að hefjast sá árstími sem hentar best til að grisja í görðum.
KENNARAR
Sævar Hreiðarsson, skógfræðingur og skógarvörður í Heiðmörk og Teitur Björgvinsson, umsjónarmaður viðarvinnslu og viðarverslunar hjá Skógræktarfélagi Reykjavíkur.
NÁMSKEIÐ Í BOÐI
Fimmtudagur 13. febrúar kl. 16-19.
KENNSLUFYRIRKOMULAG
Námskeiðið er að hluta bóklegt en að mestu leyti verklegt. Nemendur fá meðal annars að prófa sig áfram í verklagi við að ná í eldivið úr eigin garði. Námskeiðið fer fram í Heiðmörk hjá Skógræktarfélagi Reykjavíkur. Kennt er í viðarvinnslu félagsins, Þingnesvegi 5, 161 Reykjavík (Smiðjan), og næsta nágrenni sem er kjörið til verklegrar þjálfunar.
Nánari upplýsingar og skráningar má finna á vef Endurmenntunar Landbúnaðarháskóla Íslands.
