Byggðarráð Borgarbyggðar samþykkti á fundi sínum þann 2. janúar að setja á stofn vinnuhóp um framtíð háskólanna í Borgarbyggð.
Í tilkynningu frá Borgarbyggð segir að óskað verði eftir aðild fulltrúa frá Háskólanum á Bifröst, Landbúnaðarháskóla Íslands, Bændasamtökum Íslands og atvinnulífinu, auk þess sem fulltrúar frá sveitarfélaginu verða í hópnum.
Verkefni hópsins er að leita allra leiða til að styrkja starfsemi Háskólans á Bifröst og Landbúnaðarháskóla Íslands með það að markmiði að þeir verði áfram sjálfstæðar og öflugar stofnanir sem hér eftir sem hingað til bjóði nemendum sínum upp á góða menntun sem er undirstaða framfara í þjóðfélaginu. Auk þess verði skoðað sérstaklega hvort skólarnir geti styrkt stöðu sína með auknu samstarfi og fetaðar nýjar brautir í rekstri og skipulagi.
Þá segir að skólarnir hafi verið helsti vaxtarbroddurinn í Borgarbyggð undanfarin ár og starfsemi þeirra er gríðarlega mikilvæg fyrir nærumhverfi sitt. "Sterk tenging þeirra við atvinnulífið kemur fram í samsetningu vinnuhópsins," segir í tilkynningunni.
3.1.2014
