Í nýjustu útgáfu vísindaritsins Global Change Biology má finna grein um áhrif hlýnunar á köfnunarefnishringrásina í íslenskum graslendum (ForHot verkefnið á Reykjum). Meðal höfunda eru Bjarni Diðrik Sigurðsson, prófessor við deild Náttúru og skógar við Landbúnaðarháskóla Íslands.
Í greininni má finna áhugaverðar niðurstöður en þær sýna að hlýnunin leiddi til taps á lífrænu efni (kolefni) úr jarðvegi fyrstu 10 árin eftir að hún hófst. Þegar lífræna efnið brotnaði niður við um +5°C hlýnun þá jókst einnig framboð á köfnunarefni (N) í jarðveginum, sem jók framleiðni (grósku) í graslendunum yfir sumarið. Þetta var sú svörun sem búist var við. Það sem kom hinsvegar á óvart var að hlýrri jarðvegur á öðrum árstímum, einkum síðla vetrar/snemma vors, leiddi til mikils taps á N út úr vistkerfinu (niður í grunnvatn) þar sem magnið sem losnaði var of mikið svo að gróður og jarðvegsörverur næðu að halda í það utan vaxtaríma. Þetta veldur því að til lengri tíma getur dregið úr frjósemi jarðvegs ef (vetrar)hlýnun verður of mikil.
Aðferðin sem notuð var við þessa rannsókn var að gefa gróðri og jarvegi stöðuga ísótópa (15N) á mismunandi árstímum og fylgjast með afdrifum þess vikuna á eftir með því að taka sýni úr mismunandi gróðurhlutum, örveruhópum, ólíkum hlutum jarðvegsins og úr jarðvegsvatni.
Greinina má finna hér: https://onlinelibrary.wiley.com/doi/epdf/10.1111/gcb.70309
