Nám á búfræðibraut er sérhæft starfsmenntanám með námslok á þriðja hæfniþrepi. 

Umsækjandi þarf að hafa lokið þremur til fjórum önnum í framhaldsskóla og vera orðinn 18 ára. Einnig er heimilt að taka inn nemendur sem orðnir eru 25 ára gamlir og hafa reynslu úr landbúnaði en eru ekki með formlega menntun á framhaldsskólastigi. Um nemendur sem koma inn gegnum raunfærnimat gilda þær reglur sem raunfærnimatsferillinn innifelur.

Gert er ráð fyrir að umsækjandi hafi að minnsta kosti eins árs reynslu af störfum úr landbúnaði sem skólinn viðurkennir, áður en bóknám hefst.

Umsækjandi þarf að hafa lokið að lágmarki eftirtöldum áföngum í almennum framhaldsskóla (alls 45 fein): 

• Íslenska á fyrsta og öðru hæfniþrepi, alls 10 fein
• Enska á fyrsta og öðru hæfniþrepi, alls 10 fein
• Stærðfræði á öðru hæfniþrepi, alls 5 fein
• Danska 5 fein
• Efnafræði – nemendur þurfa að hafa lokið almennri efnafræði á fyrsta eða öðru hæfniþrepi (5 fein) og æskilegt er að nemendur í búfræði hafi einnig lokið lífrænni efnafræði (5 fein).
• Almenn líffræði á fyrsta eða öðru hæfniþrepi 5 fein
• Bókfærsla á fyrsta hæfniþrepi 5 fein
• Gert er ráð fyrir að nemendur séu vel tölvufærir og hafi góð tök á námstækni.

Æskilegt er að  nemandi hafi gilt skyndihjálparskírteini. 

Umsókn um skólavist skulu fylgja prófskírteini frá framhaldsskóla.  

Heimilt er að meta reynslu úr atvinnulífi til hluta fornáms á framhaldsskólastigi og er það skoðað í hverju tilviki. Umsókn um skólavist skulu fylgja prófskírteini frá framhaldsskóla og upplýsingar um starfsreynslu úr landbúnaði. 

Fjarnámið er byggt upp á svipaðan hátt og hefðbundið búfræðinám. Nemendur innritast á sama hátt í skólann og stunda námið á hálfum hraða. Flestir áfangar eru kenndir yfir vetrartímann en einhverjir áfangar koma inn á sumarönn (plöntusafn, námsdvöl og valfög).

Sjá nánar hér

LBHÍ og Menntaskóli Borgarfjarðar standa saman að námsbraut þar sem nemandi útskrifast með stúdentspróf frá MB og búfræðipróf frá LBHÍ. Námið er góður undirbúningur fyrir frekara nám í náttúru- og búvísindum. Námstíminn er fjögur ár og sækja nemendur nám á náttúrufræðibraut í MB í Borgarnesi í tvo vetur og svo nám á búfræðibraut LBHÍ á Hvanneyri í tvo vetur.

Nemandi á sameiginlegri braut MB og LBHÍ þaf að uppfylla þau inntökuskilyrði sem að LBHÍ setur m.a. varðandi reynslu af landbúnaðarstörfum. Nemendur þurfa sjálfir að sækja um nám á Hvanneyri að loknu tveggja ára námi í MB.

Markmið náttúrufræðibrautar – búfræðisvið
Að nemandi:

• hafi almenna og sértæka þekkingu á sviði raungreina
• sé vel undirbúinn fyrir háskólanám á sviði almennra náttúruvísinda, búvísinda og dýralækninga
• hafi þekkingu og færni til að takast á við búrekstur og alhliða landbúnaðarstörf, ekki síst á sviði rekstrar, bútækni, jarð- og búfjárræktar.
• þekki til og geti beitt vísindalegum vinnubrögðum í raungreinum

Frekari upplýsingar á heimasíðu MB

Símenntunarmiðstöð Vesturlands býður upp á raunfærnimat í búfræði í samstarfi við Landbúnaðarháskóla Íslands.

Matið er ætlað þeim sem hafa náð 23 ára aldri og starfað í greininni í a.m.k. þrjú ár. Fræðslusjóður greiðir fyrir þátttakendur sem hafa ekki lokið formlegri menntun.

Raunfærnimat er leið til að meta þá þekkingu og færni sem einstaklingar hafa aflað sér á vinnumarkaði. Matið getur mögulega stytt nám og verið hvatning til að ljúka því.

Nánar á vef símenntunarmiðstöðvar vesturlands