Landbúnaðarháskóli Íslands hefur gefið út nýja skýrslu, Svæðisbundinn stuðningur í íslenskum landbúnaði, sem unnin var með styrk frá Byggðarannsóknasjóði Byggðastofnunar. Höfundar skýrslunnar eru Jóhanna Gísladóttir, Torfi Jóhannesson og Tómas H. Alexander. Skýrslan er nr 178 í ritröð LbhÍ.
Svæðisbundinn stuðningur getur gegnt mikilvægu hlutverki í því að tryggja fæðu- og matvælaöryggi, stuðla að byggðafestu og efla sjálfbæra nýtingu lands og náttúruauðlinda. Skýrslan varpar ljósi á hvernig svæðisbundinn stuðningur er nýttur í nágrannalöndum Íslands til að styrkja landbúnað og búsetu á svæðum þar sem aðstæður – hvort sem þær eru náttúrlegar eða hagrænar – eru óhagstæðar. Sérstök svæðisbundin greiðslufyrirkomulög eru víða notuð í Evrópu og byggja þau oftar en ekki á ítarlegri greiningu á þáttum eins og veðurfari, hæð yfir sjó, breiddargráðu, íbúaþróun, meðaltekjum og aðgengi að atvinnutækifærum. Í skýrslunni er rýnt í hvaða viðmið gætu nýst við svæðaskiptingu í tengslum við íslenskan landbúnað – þar á meðal náttúrulegar og hagrænar aðstæður, sem og stjórnsýsluleg mörk. Settar eru fram sviðsmyndir fyrir það hvernig unnt væri að útfæra svæðisbundinn stuðning í íslenskum landbúnaði út frá markmiðum stjórnvalda í málaflokknum.
Í tilefni útgáfunnar verður haldið rafrænt málþing þriðjudaginn 4. júní kl. 09:00–10:30, þar sem höfundar skýrslunnar kynna helstu niðurstöður. Þá flytja norrænir sérfræðingar erindi og taka þátt í umræðum um hlutverk landbúnaðar í byggðaþróun í dreifbýli.
Öll velkomin. Hlekkur á málþingið og nánari dagskrá er að finna hér
