Landbúnaðarháskóli Íslands heldur málstofu um eignarhald á landbúnaðarlandi á Íslandi fimmtudaginn 4. júní kl. 10:00–13:00 á Hvanneyri. Einnig verður streymt frá viðburðinum.
Á málstofunni verður fjallað um nýja skýrslu um eignarhald á landbúnaðarlandi á Íslandi, lagaumhverfi, þróun eignarhalds og samanburð við reglur í nágrannalöndum. Einnig verður rætt um hlutverk sveitarfélaga, verndun ræktunarlands, skipulagsmál og framtíðarnýtingu landbúnaðarlands.
Atvinnuvegaráðherra flytur ávarp í upphafi málstofunnar. Höfundar skýrslunnar, Torfi Jóhannesson og Ásdís Hlökk Theodórsdóttir kynna helstu niðurstöður hennar undir yfirskriftinni „Hver á Ísland?“. Þá verður kynning frá Landi og skógi á flokkun ræktunarlands á Íslandi.
Að loknum kynningum verða pallborðsumræður undir stjórn Dr. Eyjólfs Guðmundssonar, aðstoðarrektors Landbúnaðarháskólans. Þar verður rætt um hvað niðurstöður skýrslunnar þýða fyrir landbúnað, sveitarfélög, skipulag lands og framtíð dreifbýlis. Þátttakendur í pallborði verða kynntir nánar þegar dagskrá hefur verið fullstaðfest.
Málstofan er opin öllum en óskað er eftir skráningu vegna undirbúnings og veitinga.
Dagskrá
10:00 Ávarp atvinnuvegaráðherra, Hönnu Katrínar Friðriksson
10:15 Hver á Ísland?
Niðurstöður skýrslunnar Eignarhald á landbúnaðarlandi á Íslandi
Torfi Jóhannesson og Ásdís Hlökk Theodórsdóttir
10:55 Flokkun ræktunarlands á Íslandi
Kynning frá Landi og skógi
11:10 Pallborðsumræður
Stjórnandi: Eyjólfur Guðmundsson
Þátttakendur verða kynntir nánar þegar dagskrá hefur verið fullstaðfest.
11:55 Samantekt og næstu skref
Ragnheiður I. Þórarinsdóttir, rektor Landbúnaðarháskóla Íslands
12:00–13:00
Léttar veitingar í boði Landbúnaðarháskóla Íslands