Starfsmenn Landbúnaðarháskóla Íslands hafa, um langt árabil, stundað rannsóknir á vindrofi og rykmyndun á Íslandi. Rannsóknasjóður styrkir verkefni sem nú er unnið að á vegum skólans. Í ljós hefur komið að vindrof á Íslandi er með því virkasta sem þekkist í heiminum og rykmengun héðan með því mesta. Rykið getur haft jákvæð áhrif á vistkerfi á sjó og landi en afar neikvæð áhrif á lýðheilsu. Rykið hefur margvísleg áhrif á snjóbráðnun, afkomu jökla og veðurfarsþætti. Nýlega birtist yfirgripsmikil grein um sanda og vindrof á Íslandi í ritinu Aeolian Research, sem er megintímaritið á þessu sviði. Greinina skrifa Ólafur Arnalds, Pavla Dagsson-Waldhauserová og Haraldur Ólafsson. Pavla lauk doktorsprófi á þessu sviði frá LbhÍ og HÍ á síðasta ári. Greinin er í opnum aðgangi og hægt er að nálgast hana hér.
