Dr. Sigríður Björnsdóttir hefur verið ráðin til LbhÍ sem prófessor í hestafræðum.
Sigríður er dýralæknir að mennt frá Dýralæknaháskóla Noregs og með doktorsgráðu frá Landbúnaðarháskóla Svíþjóðar á sviði myndgreiningar og faraldsfræði. Viðfangsefni doktorsverkefnis hennar var slitgigt í flötu liðum hækilsins (spatt) í íslenska hestinum. Sigríður hefur starfað sem sérgreinadýralæknir hrossa hjá Matvælastofnun í rúm 30 ár og hefur samhliða því starfi stundað umfangsmiklar rannsóknir á heilbrigði og velferð íslenska hestsins. Hún hefur birt hátt á fjórða tug ritrýndra vísindagreina sem spanna breitt fræðasvið: slitgigt, sumarexem, smitsjúkdóma, velferð hestsins í keppni, hæfileika og byggingu hestsins, hreyfieðli, helti, erfðir og þroska. Um 900 tilvitnanir skráðar í verk hennar.
Sigríður hefur verið gestaprófessor við skólann frá árinu 2020 og gestadósent í 5 ár þar á undan. Hún hefur komið að kennslu við skólann og verið virk í leiðbeiningu stúdenta bæði í grunn- og framhaldsnámi.
Við bjóðum Sigríði hjartanlega velkomna!
