Traustur þekkingargrunnur með blöndu af verklegum og bóklegum fögum

• Elskar þú hesta?

• Viltu reka hestabú?

• Viltu rækta hross?

• VIltu stunda rannsóknir á íslenska hestinum?

Nám við Hestafræðibraut er 3ja ára BS nám sem hefur það meginmarkmið að veita þér breiða grunnmenntun í hagnýtri líffræði ásamt sérþekkingu í grunngreinum búvísinda og í líffræði hesta, meðferð þeirra og þjálfun. Nemendur fá grunn í raunvísindum sem byggt er ofan á með sérgreinum landbúnaðarfræða og sérhæfðum námsgreinum um hesta.

Athugið að skyldumæting er í verklega áfanga. Kennsla fer fram á Hvanneyri. Skipulag námsbrautarinnar er í stórum dráttum þannig að grunnfög raungreina og sérfög búvísinda ásamt rekstrargreinum eru tekin með námskeiðum í reiðmennsku og hestatengdum áföngum. Í náminu er lögð áhersla á að skapa traustan þekkingargrunn á flestum sviðum hestafræða með sérstaka áherslu á íslenska hestinn. Með BSc gráðu í Hestafræði átt þú að hafa alhliða þekkingu og skilning á búfjárfræðum ásamt fræðilegri og hagnýtri þekkingu á helstu greinum hestafræða með áherslu á íslenska hesta.

Nemendur sem útskrifast af námsbrautinni eru undirbúnir fyrir fagleg störf sem tengjast hrossarækt, hrossabúskap, rekstri fyrirtækja í hestamennsku og hrossarækt sem og í fyrirtækjum sem þjóna greininni. Jafnframt eiga nemendur að hafa fengið trausta vísindalega grunnþjálfun á sviði lífvísinda og landbúnaðar- og hestafræða sem nýtist til þátttöku í rannsóknaverkefnum, í framhaldsnámi og sjálfstæðri þekkingaröflun.

Stúdentspróf eða annað framhaldsskólapróf, sem háskólaráð telur jafngilt og mælir með. Að auki er æskilegt að nemendur búi yfir hæfni á: 2. hæfniþrepi í raungreinum, þ.e. efnafræði, eðlisfræði, líffræði og jarðfræði. 3. hæfniþrep í ensku, einkum hvað varðar lestur fræðitexta og 2. hæfniþrepi í stærðfræði, einkum almennar reikniaðferðir í algebru og jöfnureikningi.

Með umsókn í námið þarf að berast staðfesting á að nemandi hafi lokið Knapamerki 2.

Hafi nemandi ekki lokið Knapamerki 2 áður en nám hefst, ber nemandinn ábyrgð á að sækja sér Knapamerki 2 á fyrstu tveimur námsárum, en staðfesting á því að nemandi hafi lokið Knapamerki 2 verður að berast eigi síður en í lok 2. námsárs, eða áður en nemandi innritast í námskeiðið 05.52.04 Reiðmennsku I á 3. námsári.

Ljúka þarf 180 ECTS einingum til BS gráðu í Hestafræði eða 60 ECTS á ári. Skylt er að ljúka öllum námskeiðum fyrsta og annars námsárs áður en nám er hafið á þriðja ári. Í námi til BS-prófs í Hestafræði eru 166 ECTS í kjarna og 4 ECTS í vali. Nemendur ljúka námi með 10 ECTS lokaverkefni og BS-ritgerð. Námsbraut í Hestafræði tekst á við efnahagsleg, líffræðileg og tæknileg skilyrði búfjárhalds og landnýtingar með sérhæfingu í ræktun og meðferð hrossa. Fjallað er um ýmsa þætti landbúnaðarfræða svo sem jarðrækt, fóður og fóðrun, kynbætur, líffræði búfjár, aðbúnað og velferð dýra auk grunngreina náttúruvísinda, s.s. efnafræði og líffræði.

Námsgreinar á þriðja námsári eru sérhæfðar hestagreinar.

Alþjóðafulltrúi LBHÍ hjálpar nemendum og starfsfólki að taka þátt í námi og samstarfi erlendis. Þar á meðal eru skiptinám í gegnum Erasmus+ og Nordplus, auk annarra spennandi alþjóðlegra verkefna. Hér færðu upplýsingar og aðstoð við að sækja um skiptinám, styrki og tækifæri til að læra og starfa með fólki frá öðrum löndum.

BSc gráða í hestafræðum undirbýr þig fyrir margvísleg störf tengdum landbúnaði, til dæmis við ráðgjöf, kennslu eða rannsóknir. Einnig nýtist námið vel sem undirbúningur fyrir nám í dýralækningum, búrekstur og störf hjá fyrirtækjum sem þjóna landbúnaði og atvinnurekstri í dreifbýli. Þú ert undirbúinn fyrir störf í atvinnugreininni við rekstur hrossabúa og fyrir sérhæfða þjónustu, ráðgjöf og hvers kyns miðlun þekkingar við hrossaræktendur og hestamenn.

Við skólann starfar öflugt nemendafélag, Nemendafélag LBHÍ og undir því eru virkir klúbbar sem sjá um mismunandi viðburði yfir árið. Kúavinafélagið Baula Hestamannafélagið Grani Hrútavinafélagið Hreðjar Skógræktarfélagið Dafnar Genus Loci félag landslagsarkitektanema Geitavinafélagið Auður.