Sæktu sumarið í Garðyrkjuskóla LbhÍ á Reykjum á Sumardaginn fyrsta



Hvernig líst þér á að taka á móti sumrinu í aldingarði, innan um trópískar plöntur, hátíðarstemningu og fuglasöng, gæða þér á glænýrri uppskeru af grænmeti, kryddplöntum og ýmsu öðru góðgæti? Sumarið er komið í garðskálanum og hægt er að heimsækja hitabeltið í bananahúsinu og pottaplöntusafninu.

Verið velkomin í Garðyrkjuskólann þann 20. apríl 2017, kl. 10:00-17:00. Nemendur garðyrkjuskólans standa fyrir opnu húsi og hátíðahöldum á sumardaginn fyrsta.

Hátíðardagskrá með forseta Íslands verður kl 13:15 þar sem garðyrkjuverðlaun, umhverfisverðlaun Hveragerðis og umhverfisverðlaun Ölfuss 2017 verða afhent.

Dagskrá verður einnig um allt svæði skólans, meðal annars:

Bingó kl. 12:00 og 16:00.  Boðið verður uppá heitt kakó og grillaða sykurpúða í garði skólans.

Kynning verður á náminu og skólanum og fólki gefst kostur á að skoða allar byggingar skólans, gróðurhús, tilraunahús, skrúðgarðyrkjuhús, stærstu banana plantekru sem staðsett er í Evrópu osfrv.

Sala á ýmsum framleiðsluvörum garðyrkjunnar, nýsprottið hnúðkál ræktað af nemendum, tómatar, gúrkur, paprikur, kryddjurtir í pottum, afskorin blóm og sumarblóm ofl.

Gefið er út tímarit garðyrkjunema, Vorboðinn, með áhugaverðu efni tengdu garðyrkju á Íslandi og verður því dreift frítt til lesningar.

Fjöldi fyrirtækja og einstaklinga verða með kynningar á vörum sínum tengdum garðyrkju, s.s. bókum, hænsnakofum, vélum, gróðurhúsum ofl.

Kaffi, vöfflur og kræsingar verða seldar í matsal skólans, pylsur, ís og aðrar veitingar verða einnig til sölu á svæðinu.

Ýmsar skemmtilegar uppákomur s.s. andlitsmálning fyrir börn, ratleikur og getraunir og hestar. Einnig gefst börnum kostur á að sá fyrir eigin kryddjurtum og taka með sér heim.

Verkefni nemenda í skrúðgarðyrkju verða til sýnis í verknámshúsinu.

Viðburður á Facebook