Í nýrri grein, sem birt er á vefútgáfu tímaritsins Icelandic Agricultural Sciences , er sýnt hvernig uppfok frá auðnum landsins er meginuppspretta ryks sem leggst yfir landið allt. Uppfok á Íslandi er með því mesta sem þekkist í heiminum og berst hundruð kílómetra í andrúmsloftinu út yfir hafsvæðin umhverfis landið. Í greininni, sem er eftir Ólaf Arnalds, deildarforseta Umhverfisdeildar LbhÍ, er sýnt fram á að stór hluti áfoks á Íslandi berst frá mjög virkum uppsprettum, svokölluðum strókasvæðum, sem oftast eru í grennd við jökla, jökulár eða jökulvötn en einnig frá söndum á gosbeltinu. Greinin er rituð fyrir gosið í Eyjafjallajökli, en segja má að hið mikla fok frá öskufallssvæði Eyjafjallajökuls staðfesti mikilvægi uppfoks sem uppspretta rykmengunar og áhrifavalds á náttúru landsins.

Mánudaginn 30. ágúst kl. 9 verður tekið á móti nýnemum í búfræði í matsal í Ásgarði á Hvanneyri. Á sama tíma eiga garðyrkjunemar að mæta á Reykjum í Ölfusi. Farið verður yfir uppbyggingu og framvindu námsins. Í vetur munu rétt um 450 nemendur stunda reglubundið nám í Landbúnaðarháskóla Íslands.

Í gær voru starfsmenn Landbúnaðarháskóla Íslands að skera korn á tilraunastöðinni á Korpu í Reykjavík. Þar á staðnum er meðal annars unnið að kynbótum á korni. Á myndinni sést þegar skornir eru tilraunareitir með nýjum íslenskum byggafbrigðum. Uppskeran verður sáðkorn, sem notað verður í tilraunir víða um land á næsta ári.